Federata e Ping Pongut të Kosovës

Në bazë të Rezolutës së Këshillit të Sigurimit të Kombeve të Bashkuara nr. 1244/99 të datës 10.06.1999, Rregullores së Administratës së Përkohshme të Misionit të Kombeve të Bashkuara në Kosovë (Rregullorja nr. 1999/22 datë 15 nëntor 1999), Udhëzimit për regjistrimin e OJQ-ve në Kosovë, Rregullores së UNMIK-ut mbi themelimin e Departamentit Administrativ të Sportit (Rregullorja nr. 2000/41 datë 18.08.2000), Urdhëresës Administrative për zbatimin e Rregullores së UNMIK-ut nr. 2000/41 dhe të nenit 2. të Statutit të Federatës së Sporteve të Kosovë, me qëllim të rregullimit të veprimtarive sportive në Federata, Lidhje të Sporteve dhe Asociacione Sportive, delegatët e Kuvendit të Federatës së Ping Pongut të Kosovës, në seancën e mbajtur më 19.10.2000, miratuan këtë:

S T A T U T I
 

1. Dispozitat e përgjithshme

Neni 1

Me këtë Statut rregullohen çështjet statutare dhe organizative të Federatës së Ping Pongut të Kosovës, të Shoqërive dhe Shoqatave që veprojnë në kuadër të saj, detyrat dhe qëllimet e saj, selia dhe amblemi, vula, mënyra e nxjerrjes së akteve normative, planeve dhe programeve, mjetet finansiare dhe çështjet tjera për mirëvajtjen dhe përparimin e ping pongut në Kosovë.

Neni 2

Federata e Ping Pongut e Kosovës (në tekstin e mëtejmë: FPPK) është asociacion i pavarur i Klubeve dhe Shoqatave të Ping Pongut të Kosovës të cilat në kuadër të tyre kanë këto seksione përmes të cilave zhvillon veprimtarinë e saj:

- Shkollat e Pingpongut
- Klubet e pingpongut
- Shoqatat tjera te pingpongut

Neni 3

FPPK bashkëpunon dhe bashkëvepron me:
- shkollat fillore, të mesme dhe fakultete,
- me organizata punuese,
- me Trupat Mbrojtëse të Kosovës,
- me qytetarët e Kosovës dhe të tjerët që gjenden në Kosovë,
- me ente dhe institucione të cilat dëshirojnë bashkëpunim,
- posaqërisht bashkëpunon me Departamentin për Sport të Kosovës.

Neni 4

FPPK zhvillon aktivitetin e vet në tërë territorin e Kosovës dhe jashtë vendit me programe të posaqme.

Neni 5

FPPK është person juridik.
Selia e FPPK-së është në Prishtinë, Pallati i Rinise

Neni 6

FPPK ka vulën e vet me formë të rrumbullakët e cila përmban këtë tekst: Federata e Ping Pongut e Kosovës, në gjuhën shqipe dhe angleze.

2. Qëllimet, të drejtat dhe detyrat programore

Neni 7

Qëllimet, të drejtat dhe detyrat e FPPK janë:
- zhvillimi dhe masovizimi i ping pongut në të gjitha shoqëritë të cilat e përbëjnë FPPK-në,
- krijimi i kushteve për plotësimin e nevojave të qytetarëve dhe punëtorëve në lëminë e kulturës fizike, rekreacionit sportiv, sportit me qëllim të ngritjes dhe forcimit të cilësive psiko-fizike të tyre,
- kultivimi i marrëdhënieve të shëndosha njerëzore në asociacionet që e përbëjnë FPPK-në,
- ngritja e cilësisë së sportit dhe rekreacionit në shkallë më të lartë kombëtare dhe afirmimin ndërkombëtar,
- aktivizimi i shoqërive të reja në qendrat të cilat nuk kanë qenë të aktivizuara fare deri tani,
- organizon shkollimin e kuadrave për të gjitha seksionet e saja,
- organizon gara sportive në Kosovë dhe jashtë Kosovës,
- organizon gara për të gjitha kategoritë në të gjitha shoqëritë e ping pongut të Komunave,
- organizon memoriale të ndryshme,
- Kryen edhe punë tjera me interes të ping pongut në Kosovë dhe më gjerë.

Neni 8

Shoqëritë e ping pongut të posaformuara për regjistrim në FPPK janë të obliguara të paraqesin kërkesën së bashku me procesverbalin e Kuvendit themelues, Statutin, Rregulloren e punës së Kuvendit, planprogramin (të harmonizuar me Statutin e FPPK-së). Për regjistrimin e Shoqërisë vendosë Kryesia e FPPK-së.

Neni 9

Shoqëritë e ping ponut janë të obliguara që për çdo vit t’i dorëzojnë raportet mbi aktivitetin njëvjeçar, plan-programin e punës, planin finansiar dhe raportin finansiar.

3. Organet e Federatës së Ping Pongut të Kosovës

Neni 10

Organi i FPPK-së është: Kuvendi.

Kuvendi i FPPK-së:

Neni 11

Kuvendi i FPPK-së është organi më i lartë të cilin e përbëjnë anëtarët e Shoqërive të Ping Pongut të Kosovës.
Në mbledhje të Kuvendit marrin pjesë delegatë të deleguar nga Klubet dhe shkollat e ping pongut dhe ate: nje delegatë nga secili Klub
Nga delegatët 10% do të jenë për pakicat – entitetet kurse Kuvendin e përbëjnë 30% femra.

Neni 12

Mandati i delegatëve për mbledhje të Kuvendit zgjatë 4 vjet dhe ai mund të përsëritet vetëm edhe një herë.
Kuvendi merr vendime me shumicën e votave të anëtarëve prezent 50%+1.

Neni 13

Votimet në Kuvend bëhen me vota të fshehta, nëse Kuvendi nuk vendos ndryshe.

Neni 14

Kompetencat e Kuvendit të FPPK-së janë:
- nxjerr Rregulloren e punës së Kuvendit,
- nxjerr Statutin dhe bën plotësimet dhe ndryshimet e tij,
- nxjerr dhe aprovon programin e punës dhe planin finansiar,
- shqyrton raportin e punës dhe raportin finansiar dhe të njejtat i miraton,
- përcakton bazat e bashkëpunimit ndërkombëtar,
- miraton planin e zhvillimit të sportit të ping pongut në Kosovë, përcakton parimet e zhvillimit dhe organizimin e garave, punës së seksioneve,
- zgjedhë dhe shkarkon organet e veta,
- shqyrton dhe vendos për kërkesat lidhur me largimin e asociacioneve të saja nga FPPK,
- vendosë edhe për punë tjera në interes të ping pongut në Kosovë dhe jashtë saj,
- jep pëlqimin për pranimin e shoqërive të ping pongut të komunave në Federatën e Ping Pongut të Kosovës.

Neni 15

Kuvendi i FPPK-së për punën e vet i informon asociacionet që e përbëjnë ate.
Kuvendi i rregullt mbahet një herë në vit e sipas nevojës mund të mbahet më shumë herë.

4. Organet e Kuvendit të FPPK-së

Neni 16

Organet e Kuvendit të FPPK-së janë:
- Kryetari, nënkryetari, sekretari dhe arkatari,
- Bordi,
- Këshilli mbikqyrës.

Kryetari

Neni 17

Kryetarin e FPPK-së e zgjedh Kuvendi me shumicë votash të anëtarëve prezent në seancën e Kuvendit.
Mandati i Kryetarit zgjatë 4 (katër) vjet me të drejtë rizgjedhjeje edhe për 1 (një) vit.

Neni 18

Kryetari mund të shkarkohet edhe para skadimit të mandatit nëse e humbë besimin dhe për moskryerjen e detyrave.
Shkarkimi i Kryetarit dhe Bordit bëhet në të njejtën mënyrë si zgjedhja e tyre.

Neni 19

Kryetari për punën e vet i përgjigjet Kuvendit të FPPK-së.

Neni 20

Autorizimet e Kryetarit janë:

- kujdeset për mirëvajtjen e punës së Kuvendit, Bordit dhe organeve tjera të saj,
- organizon, drejton dhe udhëheq punën e Kuvendit dhe të Bordit,
- konvokon senacat e Kuvendit dhe Bordit,
- është urdhëresë për zbatimin e planit finansiar,
- përfaqëson FPPK-në para personave të tretë,
- nënshkruan vendimet, konkluzat dhe proceverbalet e organeve të Kuvendit dhe Bordit,
- ka të drejtë të largojë çdo anëtarë të Bordit nëse nuk është aktive dhe nuk vepron në frymën e akteve normative të FPPK-së gjer në seancën e parë të Kuvendit,
- është përgjegjës për zbatimin e mjeteve materiale dhe raporton, sipas nevojës, Bordit, Kuvendit dhe Departamentit të Kosovës për sport,
- ka të drejtë vetoje në çdo vendim të Bordit të FPPK-së dhe organeve tjera,
- kryen edhe punë tjera të cilat janë në interes te FPPK-së.

Nënkryetari

Neni 21

Nënkrytarin e zgjedhë Kuvendi i FPPK-së me mandat 4 (katër) vjeçar me mundësi të rizgjedhjes edhe për 1 (një) vit.

Neni 22

Në rast të mungesës më të gjatë të kryetarit atë e zëvendëson nënkryetari i cili i ka autorizimet e kryetarit gjatë mungesës së tij.

Sekretari

Neni 23

- është përgjegjës për zbatimin e të gjitha vendimeve të organeve të FPPK-së,
- është përgjegjës për zbatimin e plan-programit të FPPK-së,
- është urdhërdhënës i shërbimit profesional të FPPK-së,
- lidhë marrëveshje me palët e treta me pëlqimin e Kryetarit dhe Bordit,
- i njofton mjetet e informimit me vendimet dhe konkluzat e saj,
- përpilon plan-programet e punës së FPPK-së, projekte, etj.
- Kryen edhe punë të tjera sipas nevojës dhe në bazë të autorizimeve të kryetarit të Bordit.

Neni 24

Sekretarin e zgjedh Kuvendi i FPPK-së me mandat 4 vjeçar me mundësi rizgjedhjeje edhe për 1 (një) vit.

Neni 25

Sekretari për punën e vet i përgjigjet Kuvendit të FPPK-së dhe kryetarit të Bordit.

Arkatari

Neni 26

Arkatarin e zgjedhë Kuvendi me mandat 4 veçar me mundësi rizgjedhjeje edhe për 1 (një) vit.
Për punën e vet arkatari i përgjigjet kryetarit, nënkryetarit, sekretarit, Bordit dhe Kuvendit.

Neni 27

Detyrat e arkatarit janë:
- mban dokumentacionin materialo-finansiar të FPPK-së,
- bën pranimin e të hyrave dhe pagesën e të dalurave të FPPK-së,
- mban shënimet që kërkon kontabiliteti bashkëkohor në përputhshmëri me rregulloret e bankës,
- mban kontabilitetin për mjetet themelore dhe shpenzimet materiale të FPPK-së,
- përpilon bilanset periodike dhe përfundimtare,
- është përgjegjës për ruajtjen e dokumentacionit finansiar të FPPK-së,
- zbaton vendimet e urdhëresave të kryetarit, nënkryetarit dhe sekretarit,
- kryen edhe punë tjera sipas vendimeve dhe urdhërave të urdhërdhënësve.

Bordi

Neni 28

Bordi është organ ekzekutiv i Kuvendit të FPPK-së dhe ushtron punët në përputhje me këtë Statut.

Neni 29

Bordi numëron 12 anëtarë të cilët zgjedhin: kryetarin, nënkryetarin sekretarin, arkatarin dhe 3 anëtarë të cilët i zgjedh Kuvendi ndërsa 3 tjerë i emëron kryetari.
Mandati i tyre zgjatë 2 (dy ) vjet me mundësi të përsëritjes edhe për 1 (një) vit.

Neni 30

Të gjitha zgjedhjet në Kuvend për Bord mbahen me vota të fshehura dhe çdo delegat ka të drejtë të kandidohet për postet e Bordit.

Neni 31

Në Bord duhet të përfshihen entitetet me 10% edhe në Kuvend dhe në Bord si dhe organet tjera.

Neni 32

Së paku 30% e delegatëve të Kuvendit duhet të jenë të gjinisë femërore. Kjo vlen edhe për organet tjera.

Neni 33

Në postet e Bordit duhet të përfshihet një delegat nga entitetet dhe një delegate e gjinisë femërore.

Neni 34

Bordi takohet më së paku 1 (një) herë në muaj dhe sipas nevojës.

Neni 35

Bordi ka këto detyra:
- t’i realizojë vendimet e Kuvendit,
- të hartojë Rregulloren e vet të punës dhe Rregulloren e organeve tjera,
- përpilon plan-programe dhe planin finansiar,
- harton projekte të nevojshme për FPPK-në,
- nxjerr sistemin e garave,
- cakton udhëheqësit e seksioneve të FPPK-së,
- zgjedhë komisionet për kryerjen e detyrave sipas nevojës.

Neni 36

Për punën e vet Bordi i përgjigjet Kuvendit të FPPK-së.

Neni 37

Burimet finansiare janë nga anëtarësia, donatorët, marketingu, biletat hyrëse dhe nga Departamenti për Sport i Kosovës.

Këshilli mbikqyrës

Neni 38

Këshilli mbikqyrës numëron 3 anëtarë të cilët i zgjedh Kuvendi i FPPK-së.
Mandati i anëtarëve të Këshillit mbikqyrës zgjat 4 (katër) vjet me mundësi të rizgjedhjes edhe për 1 vit.
Këshilli mbikqyrës zgjedh Rregulloren e vet të punës.
Këshilli mbikqyrës kujdeset për punën dhe veprimtarinë materialo-finansiare të FPPK-së.
Këshilli mbikqyrës për punën e vet i raporton Kuvendit 1 (një) herë në vit dhe ate për çështjet finansiare.

Neni 39

Në çdo seancë të Kuvendit dhe organeve tjera të FPPK-së mbahen procesverbalet të cilat ruhen në arkivin e shërbimit të administratës së FPPK-së dhe për te përgjigjet sekretari.

Dispozitat përfundimtare

Neni 40

Plotësimet dhe ndryshimet e këtij Statuti bëhen në të njejtën mënyrë si dhe aprovimi i tij.

Neni 41

Ky Statut hyn në fuqi në ditën e aprovimit.

Prishtinë, 01 Nëntor 2000

Federata e Ping Pongut të Kosovës
Sherafedin Zhitia, kryetar